SHILLONG: Meghalaya Board of School Education (MBOSE)-ni ning·o Class XII-ni bangki dongkuenggipa subject mingbrini porikkarangko ong·atchina sorkariko diditokengoba, da·o ia bangki porikkarangko ong·atani katta dongjawaha ine Mongolbar salo a·dokni Education Minister Lahkmen Rymbui talatangaha.
“Manderangde jekoba aganna man·aia indiba chinga obostarangko nina nangao ga·akskaa,” ine sorkarini manchianiko dingtangatani cholrang dongama ine sing·anina Education Minister aganaha.
Class XII-ni bangki porikkarangko ong·atgija COVID-ni a·sel SSLC aro HSSLC porikkarangko serikna man·gijagipa candidate-rangna da·o July jani gisepo porikkako ong·atskana sorkari tik ka·angahachim ine nikna man·a.
Class 12 board porikkani bangki dongkuenggipa subject mingbriara computer science, statistics, vocational studies aro western music ong·achim.
Indake ong·engon, computer science aro informatics practices gita dakgipa subject-rangara chatro chatrirangni score ka·na man·gipa subject-rang ong·achim aro ia subject-rangko porikka ra·jagenchimode chatro chatrirangni percentage aro position-na nangchakeaniko ra·banaba gnang ine ia subject-rangni porikkako ra·china gita St Anthony’s Higher Secondary School-ni principal Fr Anthony Kharkongor, a·dok sorkariko didiangskaaha.
Bang·a manderangan iani bidingo kachariona re·angaha ine janapatengon, “Mitam manderangde porikkako ong·atchina mol·mole supreme court-onaba re·angahachim indiba ia case-ko kachari jegalataiaha,” ine Rymbui parakataha.
Skulrangko kulipiltaiani gimin sing·on, da·o dipet Meghalaya a·doko COVID-ni obostarangko name nichengkuenga aro skulrangko kuliani giminde chanchia dongkuja ine a·dokni Education Minister parakataha.
