SHILLONG: Meghalaya a·dokni saksa ja·delbatgipa Additional Chief Secretary-ko Meghalaya Energy Corporation Limited (MeECL)-ni chairman-cum-managing director (CMD) songskaahani gimin a·dokni opposition Congress dol, MDA sorkariko mittelpilangaha indiba a·dokni power minister James K Sangma-ko galchina ba ua an·tangan kamtangko watchina dabiangskaaha.
“Chingni dabianiko knachake MeECL-ni CMD ong·enggipa official-ko ra·galenba uni biapo saksa kam changgipa aro Additional Chief Secretary-ko CMD songskaahani gimin chinga sorkariko mittelpilna ska. Iani bidingo anga dingtangmancha jolni political dolrangko aro gipin dolrangkoba mittelpilna ska,” ine Mongolbar salo Congress dolni MLA aro ku·wattimgipa Zenith Sangma parakataha.
A·dokni power minister ong·enggipa James K Sangma-ko ra·galchina dabiangskaengon, ua power minister ong·e dongkugenchimode MeECL aro power department-o ong·gija dakanirangko am·sandianio kamrangko kal·akani cholrang dongnaba gnang aro ian Inquiry Commission-ko songani miksonganiko pe·ani gita ong·gen ine Congress dolni dilgipa parakataha.
Power department-o ‘Self Identified Power Project’-ni bimingo ong·gija dakgipa minggipin kam dongkuenga ineba Congress dolni dilgipa parakataha aro Power department-o ong·gijagipa dakgipa pilak kamrangkon minganti inquiry dakchina dabiangaha.
“Da·ororo COVID giproroaniko champengna a·dok damsaoni damgipinona aro a·ja damsaoni damgipinona re·ruraaniko champengengani gimin gipin biaprangoni manderang Meghalaya a·dokona re·bana man·ja indiba janapgimin power project-na Expression of Interest (EOI)-ko on·manahani gimin seokgimin company-rangnasan project-ko on·ani cholrang dongenga,” ine Sangma parakatenba, a·dokni namgnina ia EOI-ko ta·raken den·galpilna nanga ine dabiangaha.
