SHILLONG: Koelarangko niam gri bikotanichi Lukha chiring da·o tangsime ong·katengahani a·sel kenchakna nanganirang ong·engahani gimin ia chiringko tangatpiltaina aro rongtalatpilna gita a·dokni Forest & Environment department, kamrangko ka·na a·bachengengaha ine a·dokni Forest & Environment Minister James K Sangma parakataha.
Forest Minister-ni parakatani gitade, United States aro Israel a·songni u·i-ma·sigipa manderang baksa Forest department agangrike, ia Lukha chiringko tangatpilna aro ripinge rakkina cholrangko sandienga aro ia chibimao bringimin bisirangko galna gita chibimarango chagipa sam-bijakrangko jakkale nienga.
U·i-ma·sigipa manderang baksa uamang agan-chanchirimanirangko dakna siengkuani gimin mikkangchi a·dokni nitogipa biaprang aro samtangtangko nambate rakkiangna kamko ka·enga ineba Forest & Environment Minister parakataha.
“Kamrangko dake nianio chinga chu·sokgipa ong·aniko nikna man·enga aro chinga iarangko dake niangkugen. Ia chibimakosan ong·aigija chinga gipin chibimarang jeon, acid-rang brinahachim, uarangkoba rongtalatna kam ka·anggen,” ineba James Sangma parakataha.
Chiring chibisikrangko tangatpilna kam ka·anio sorkari aro Forest department baksa bakrimchina gitaba ua a·doko songdongenggipa manderangko aro dingtang dingtang dolrangko didiangaha.
“An·chingni samtangtango donggipa buring bolgrim, chiring chibisik aro uandakgipa pilakan an·ching a·doko songdongenggipa mande sakantinin ong·a aro samtangtangko ripinge rakkianio an·ching pilakan bakrimna nanga,” ine Forest Minister parakataha.
Dingtang dingtang kamrangko ka·e cha·engon, samtangtango donggiparangko ripinge rakkina nangani giminba a·dokni Forest Minister aganangaha aro karkanarangkoba, sorkarini dongimin niamrangko ja·rikchina didiangaha.
Environment & Forests Ministry-ni bimingko Environment, Forests & Climate Change Ministry ine mingskachina gitaba Forest Minister, a·dok aro ma·mong sorkariko didiangaha.
