TURA: Adita salrangna skang, Nagaland a·dokni adasa sakgni, Haryana a·doko kragija bewalo siangna nangahani gimin ia a·selni bidingo am·sandianirangko dakenba dos donggipa manderangni kosako niam gita sastirangko on·china Tura-ni Lok Sabha MP Agatha K Sangma, Union Home Minister Amit Shah-na sedoataha.
“A·songni mongsonggipa biapo iandake adasa sakgnini sianiara chanchichipna kragipa kam ong·enga aro iani bidingo kakketko ma·sina gitade jakgitele am·sandianiko dakna nangchongmotenga,” ine Agatha, Union Home Minister-na seatgipa chittio janapataha.
Ia a·selni bidingo ta·raken am·sandianirangko dakenba dos donggipa manderangni kosako rakgipa ja·kurangko de·china didiatengon, iandakgipa ja·kuko de·anichi Rosy aro Samuel Sangma-ni nokdangna kakket bichalko on·na man·gen aro ian a·songo songdongenggipa manderangna ka·dongchakaniko on·na man·gen ine Tura-ni MP parakataha.
Meghalaya a·dokni Chief Minister Conrad K Sangma-ba ia a·selni bidingo Delhi-o donggipa Nagaland a·dokni dilgiparang baksa aro sianggipa adasa sakgnini nokdang baksa agangrikataha ine kobor on·aha.
Ia a·selna an·tangni suk ong·gijaniko parakatengon, kakketko sandie dos donggipa manderangna sastirangko on·na gita ua an·tangba an·tangni man·na gita dakchakanirangko on·gen ineba Chief Minister parakataha.
“Nagaland a·dokni A·chik chadambe sakgni Haryana a·doko siaha ine angna koborko on·ataha. Ia a·selna anga namen duk ong·a aro anga kalimenggipa nokdangna an·tangni man·na gita dakchake on·na ku·rachakaniko on·ataha,” ine Sangma parakataha.
Ian namen kragijagipa a·sel ong·aha ine janapatengon, ia a·selni bidingo ua Delhi-o donggipa Nagaland a·dokni dilgiparang aro Nagaland Garo Tribal Council-ni dilgiparang baksa agangrikataha ine Chief Minister parakataha.
