TURA: Ia sal somoirango COVID-ni giproroaniko champengna gita South Garo Hills a·jaoba night curfew-ko ra·gatengon, Nongalbibra-oniko niam gri Bangladesh a·songona koelarangko salangenga ine matnangenba, Baghmara Police Station-ni officer-in-charge-na FIR-ko ka·doangaha.
FIR-ko Sombar salo, Garo Students Union (GSU) Mindikgre regional unit-ni president Greneth M Sangma ka·angaha aro uni FIR-o parakani gitade, South Garo Hills a·jao COVID-ni giproroaniko champengna lockdown-ko ra·gate nangchongmotgipa bosturangko salgipa garirangna agrede gipin garirangni re·ruraaniko champengengoba, koelarangko walni somoirango Gasuapara exit point gita Bangladesh a·songona niam gri salangskaengachim.
“Ia sal somoirango COVID-ni giproroaniko champengna gita a·dok gimikon night curfew-ko ra·gate garirangni re·ruraanirangko champengengoba salantian truck-ni truck garirango Bangladesh a·songona koelarangko salangskaenga aro ia garirangko district administration aro police-rang, champengna man·jaenga,” ine GSU Mindikgre unit-ni president parakataha.
Da·o dipet Nongalbibra-oniko Bangladesh aro gipin biaprangona koela salna gita permission-rangko on·ani dongkujani gimin ian garirangni re·ruraaniko champengna dongimin niamko pe·ani gitasan ong·aigija koela bikotna aro salrurana dongimin niamrangko pe·ani gitaba ong·enga ine Sangma parakataha.
Jekai South Garo Hills a·jao ramram manderangni skatang re·ruraanirangko champengatenga, apsan daken koela salgipa garirangni re·ruraaniko nambate aro bilakbate nirokchina gitaba GSU-ni dilgipa, South Garo Hills a·jani police aro district administration-ko didiataha.
