SHILLONG: Garo Hills-o chief minister-na agre je saksakamkam minister dongpagipakon dingtang dingtang kamrangna matnange aganrongengani gimin Phulbari-ni NPP MLA SG Esmatur Mominin, opposition Congress dolko jegalataha.
NPP MLA-ni parakatani gitade, Garo Hills-o Chief Minister Conrad K Sangma-na agre, uni adatang aro Dadenggre-ni NPP MLA James K Sangma saksasan minister-ni kamko jako ra·e ka·paengachim aro uko Congress dolni dilgiparang, dingtang dingtang kamrangna matnange, kamoniko ra·galchina dabitokskaengachim.
“Garo Hills-o gimik sak 24 MLA-rang gnang indiba ia sak 24 MLA-rangoni Chief Minister baksana minister saksakamkamsan dongaia. Ia saksakamkam minister-ba an·tangni department-o dingtanganiko ra·bana rakbee kamrangko ka·engon, uni kosako maming pangchakani gri matnanganirangko dake uko ra·galchina Congress dolni dilgiparang dabitokskaenga,” ine Mominin, kobor ra·timgiparangna parakataha.
Meghalaya Energy Corporation Limited (MeECL)-ni dingtang dingtang kamrangna Congress dolni mitam dilgiparang aro mongsongbate Zenith Sangma, a·dokni power minister ong·enggipa James K Sangma-ko matnange aganrongengachim ine nikna man·a.
Batanggimin changoba James Sangma-oniko home, food supply aro DCA portfolio-rangko ra·pilaha ine an·tangni suk ong·gijaniko parakatengon, department-ni namgnina kam ka·enggipa dilgipako iandake matnanganiranga namen kragijani ong·enga ine Phulbari-ni MLA parakataha.
Congress dolni dilgiparang pangnan sorkariko matnange ronasa jotton ka·ronga ine janapatengon, MeECL-o pilak kamrangnan Board of Director-rangsa chanchie kamko ka·dilronga aro iako opposition dolni dilgipa ma·sina nanga ine Mominin parakataha.
MeECL aro Power department-o ong·gija dakgipa kamrangna matnanganirangko man·ani ja·man sorkari jrip nie dongaijahan indiba CMD-ko ra·gale, department-o ong·enggipa obostarangko am·sandina gita inquiry commission-ko songe on·aha ineba NPP-ni MLA parakataha.
