TURA: West Garo Hills a·jani dingtang dingtang office ba uandakgipa kam ka·chakram biaprango me·chikrangni kosako ong·gija dakanirangko champengna gita Budbar salo West Garo Hills a·jani Deputy Commissioner Ram Singh, dingtang dingtang department-ni officer-rang baksa DRDA conference hall-o tom·aniko ong·atangenba, kam ka·chakram biaprang me·chikrangni kosako ong·gija dakanirangko champengna dongimin niam, chong·motan ‘Sexual Harassment of Women at Workplace (Prevention, Prohibition & Redressal) Act 2013’-ni bidingo chanchirimdilangaha.
Ia tom·anio West Garo Hills a·jani Deputy Commissioner Ram Singh, jinmana aganprakengon, ia ‘Sexual Harassment of Women at Workplace (Prevention, Prohibition & Redressal) Act 2013-ni ning·o dongimin niamrangni bidingo talataniko on·angenba, ia niamrangara sorkari office-rangosan ong·aigija pilak biaprangon me·chikrangko chel·chakna dongimin niamrang ong·a ine parakangaha.
Kam ka·chakgipa biaprango me·chikrangna naljokaniko aro me·chikrangni mikkim rasongko rakkina gita ia niamrangko tariaha ineba Deputy Commissioner parakataha.
Deputy Commissioner-ni parakatani gitade, ia dongimin niamrango pangchake kam ka·chakgipa biaprango me·chikrangni kosako ong·gija dakanirangko nirok sandina gita Internal Complaint Committee (ICC)-ko ba Local Complaint Committee-ko ba Complaints Committee-ko songna nanga aro ia committee-ko me·chikan dile, committee-ni bang·bata membor-rangan me·chik ong·na nanga.
Sorkari office-rangosan ong·aigija private company-rangoba ia niamrangko ra·gatna nanga ine didianiko on·angengon, department-tangtango internal complaint committee-ni membor-rangko songenba antignini gisepon Tura-ni DC office-ona on·atchina gita DC, pilak department-ni officer-rangkon ge·etangaha.
Department-tangtango kam ka·giparangko tika su·e ra·china gitaba ua ia tom·anio dingtang dingtang department-ni officer-rangko didiangjolaha.
