TURA: Garo Hills-oba aro mongsongbate Tura-o COVID man·giparang batroroengon, Garo Hills Autonomous District Council (GHADC)-ni Chief Executive Membor (CEM) aro Chairman sakgnian positive ong·e da·o dingtang nape dongtokna nangengani gimin GHADC-ni budget session-koba ra·doatna nangao ga·akengaha.
Ia salgittamna ong·atna sienggipa budget session-ko July 27 tarikoni a·bachenge 29 tariko matchotatani ong·engachim indiba GHADC-ni CEM aro Chairman sakgnian da·o Covid man·ahani gimin ia session-ko ra·doatna nangskaengaha.
GHADC-ni Chairman Rakesh A Sangma-ni u·iatani gitade, ia antini gisepo ua COVID-na porikka ra·e nion ua positive ong·ahani gimin noktango dingtang nape dongna gita nangenga aro July 27 tarikoni a·bachengatna sienggipa budget session-koba ra·doatna nangao ga·akengaha.
Apsan daken, GHADC-ni CEM Benedic R Marak-ba COVID-19-na porikka ra·e nion, uaba positive ong·e da·o dingtang nape dongna gita nangengaha.
Koborko on·ani gitade, CEM-ni ‘adviser’ aro BJP-na kam ka·gipa Akki Sangma-ba COVID-19-na porikka ra·e nion positive ong·aha aro High Powered Committee (HPC)-ni chairman-na songako man·gipa Rudraswar Momin-koba quarantine dake an·tangko porikka ra·e nichina doctor-rang u·iataha.
Chairman-ni dongjamiting somoirango session-ko dilna gita da·o dipet GHADC-o deputy chairman-ko seoka dongkujaengachim ine nikna man·a.
