SHILLONG: Salgro salaramni dingtang dingtang a·dokrang baksa Assam a·dokni simarango meligrikna man·jae so·sojengjeng aro dinggrikanirangko nikna man·engani gimin salgro salaram a·dokrangni gisepo meli nangrime donganiko rakkina man·jaenga ine Meghalaya a·dokni Opposition Congress dol, BJP-chi dilenggipa North East Democratic Alliance (NEDA)-ko matnangataha.
Ia NEDA-ko 2016 bilsini May 24 tariko Bharatiya Janata Party (BJP) dol, salgro salaram a·dokrango Congress dolni kosako warachakna gita bikotdilahachim aro ia alliance-ko dilna gita Himanta Biswa Sarma-kon convenor songahachim ine nikna man·a.
Indake ong·engon, NEDA-ko songanichi salgro salaram a·dokrango donggipa dingtang dingtang political dolrang aro a·dokrangni gisepo meli nangrimaniko rakkina man·jaha ine Meghalaya a·doko opposition dolni Chief Whip PT Sawkmie parakataha.
Adita salrangna skangsan, Assam aro Mizoram a·dokni sima jolo dolgni dinggrikanichi adita sak manderang so·otako man·na nangahachim aro ia apsan salon, Assam aro Meghalaya a·dokni simaoba dolgnini gisepo adita so·sojengjeng ong·aniko nikna man·ahani gimin Congress dolni dilgipa NEDA-ko matnangataha.
MDA-o bakrimenggipa United Democratic Party (UDP)-ba NEDA-o bakrimgipa dol ong·achim indiba Citizenship Amendment Act-ni bidingo so·sojengjeng ong·angani ja·man NEDA-o bakrimaniko UDP ra·pilskaahachim ine nikna man·a.
NEDA-ko songani ja·manoba Assam a·dok, salgro salaram jolrango dal·batgipa ine an·tangko mesokna jotton ka·enga aro salgro salaramni gipin a·dokrango napdrana jotton ka·enga ine matnangatengon, Assam-ni chief minister Himanta Biswa Sarma-ni aganani bewalan salgro salaramni gipin a·dokrangnade maming simsakgijaniko mesokani ong·a ine Sawkmie parakataha.
