Sima arini bidingo joint com-ni chanchianiko mikkang antio u·iatgen: Dy CM

SHILLONG: Assam aro Meghalaya a·dok damgnini gisepo sima-ario ong·enggipa obostarangni bidingo joint committee-rangni apsan tom·e chanchirimaniko mikkang antirangsa officially u·iatnaba donga ine mejal Sonibar salo Deputy Chief Minister Prestone Tynsong koborna parakataha.
“Chinga da·o joint committee-ni u·iatako nisengsoenga aro uan ia antini gisepo ong·jagenchimoba mikkang antini gisepo committee-ni gita officially u·iatskanaba donga,” ine Tynsong, mejalo ShillongTimes kobor ra·timgiparangna parakaha.
Assam aro Meghalaya a·dok damgnini dilgiparang, da·ororo sima-ari jolo ong·enggipa obostarangko mikkangchi obostarang ong·angtaijana gita baikamgipa namgrikatani cholko ra·bana nanga ine dolgnian ma·sichakgrike ba nigrike kamrangko ka·enba, dingtanggrikenggipa mongsongbatgipa dam 12 jolrangoniko a·bachengo dam 6 mangko jako ra·e namgrikatchengna miksongenga.
Cabinet minister-chi dilenggipa dol gittam gittam jolni committee-rangko songna gita a·dok damgnian tik ka·aha, aro seokgimin committee membor-rangni dam dok biap ba jolrangona re·ange nirokeani ja·mano aro dolgnini agan-golpogrikangani ja·manosa jasani gisepon report-rangko on·angskagen.
Koborna parakatani gitade, a·dok damgnini committee seokgipao sakbonga membor-rang donggen aro uamangan a·doktangtangna uamangni chanchirime namgrikatna kamko ka·angengani bidingo officially u·iatskagen.
Indake ong·engon, committee ge·prakon sakprak cabinet minister-rang dilangskagen, jerangan sal 30-ni gisepon Shillong aro Guwahati songjinmarango tom·e chanchirimani ja·mano sima-ari jolo nanggrikenggipa biapona damsan re·ange nirokeani ja·mano report-rangko on·anggen ineba koborna parakaha.
Uandake, je biap ba sima-ari jolrango kajia-golmalrang komia aro altubate namgrikatna gita man·gen, ua biaprangara dam 12-oni dam dok a·ja ba jolrangan ong·skaenga, uan Tarabari (4.69 sq km), Gizang (13.53 sq km), Hahim (3.51 sq km), Boklapara (1.57 sq km), Khanapara-Pilangkata (2.29 sq km) aro Ratacherra (11.20 sq km) jolrang ong·a, aro uarangan gipin dongkuenggipa dam dok biap ba jolrangna bateba “altubate namgrikatani cholko ra·bana man·gen” ine ma·sina man·aha.
Apsandake mingsogimin dam dok biaprangara Meghalaya-ni West Khasi Hills, Ri Bhoi, East Jaintia Hills district-rang aro Assam-ni Cachar, Kamrup Metro aro Kamrup district-rangan ong·skaenga ineba koborna parakaha.