TURA: Re·anggipa Mongolbar walo, manderangko dakait dakna jotton ka·engmiting somoio mande sakgittamko police-rang, West Garo Hills a·jani Gondagre joloniko rim·na man·aha.
Police-rangni u·iatani gitade, ia manderangoniko chongipa silchidare ge·sa aro atte pongsako man·aha.
Iani bidingo police-rang mokordoma ka·e, am·sandianirangko dakengkua ineba police-rang u·iataha.
Koborko on·ani gitade, ia jolo songdongenggipa manderang mikrake kamko ka·anichisa ia mande sakgittamko rim·na man·aha.
Jolo tom·tomaniko rakkiangna man·na gita mikkangchiba iandake mikrake kamrangko ka·china aro police-rangna dakchakanirangko on·angkuchina gitaba police-rang, jolo songdongenggipa manderangko didiataha.
