Sima ario meligrikgijaniko namatani cholde ‘on·sregrikanian’ ong·gen: Kharlukhi

SHILLONG: Assam aro Meghalaya a·dokni sima arirango songdongenggipa manderangni namgni chanchibebegenchimode aro politics-ni gita man·dapanirangna rikjagenchimode a·dok damgnini gisepo ‘on·e ra·skaani’ cholan nambatgipa chol ong·enga ine National People’s Party (NPP)-ni state president aro a·dokni Rajya Sabha MP WR Kharlukhi parakataha.
“A·dok damgnini simarango songdongenggipa manderangsa bilsi 50-na saknaanirangko chakna nangtokengaha, uni gimin an·ching simarango songdongenggipa manderangni namgnina chanchibebegiparang ong·genchimode aro an·tangtangni politics-ni gita man·dapanirangnasan rikjaenga ong·ode ia cholan nambatgipa ong·enga aro ia neng·nikaniko namatna gita ian somoi ong·engaha,” ine Kharlukhi aganaha.
Assam-ni Chief Minister Himanta Biswa Sarma-ni agangipa kattarangna chakpaaniko parakatengon, a·dok damgnini gisepo apsan asonge agangrikanichi aro ‘on·e ra·pilskaani’ bewalko ja·rikanian a·dok damgnini gisepo meligrikgijaniko namatna gita nambatgipa chol ong·enga ine Kharlukhi parakataha.
Dolgni apsan asonge agangrikanian nambatgipa chol ong·enga ine janapatengon, “A·dok damgnini dilgiparangon anga ka·dongenga maina indita bilsirangna meligrikgijaniko namatna gita da·o somoi ong·engaha,” ine NPP-ni state president parakataha.
A·dok damgnini simarango meligrikgijanirangko namatna gita itihasko ja·rikna gitaba nanga ine janapatengon, “Itihaskoba nipilna gitade nangchongmota indiba itihas gita re·genchimode Nagaon (Assam)-ba Meghalaya a·dokni baksa ong·gen maina ian Jaintia singhasonni bakan ong·achim,” ine Kharlukhi parakataha.
“A·dok damgnini simarango meligrikgijanirangko agangenchimode dolgnian an·tangtangni biaprangko a·kangtokenga aro iako chol mingsanchide namatna man·jawa. A·dok damgnini gisepo meligrikna man·jaenggipa dam 12 biaprang donga aro ia dam 12 biaprangko dolgnian a·kanggrike dongaiode maming dakeba meligrikgijaniko namatchipna man·jawa,” ine Kharlukhi talataniko on·angaha.
A·dok damgnini gisepo meligrikgijanirangko namatpilna gita a·dok damgnini sorkarirang agangrikengon, itihaso pangchakesa agangrikchina aro ‘on·a-ra·a’ dakgipa bewalo songgigrikjachina Congress dabiskaengachim ine nikna man·a.
Meghalaya aro Assam a·dokni Chief Minister-rang, changgnina apsan asonge agangrikahachim aro ia neng·nikanirangko namatna ja·ku de·anio, meligrikna man·jaenggipa damdok biaprangni bidingo kamko ka·chenga gita dolgnian ku·rachakgrikahachim.