SHILLONG: Tom·tomaona re·bapilna gita sorkari baksa agangriknade maming niamrangko donna nangjawa ine Sukrobar salo Meghalaya a·dokni Chief Minister Conrad K Sangma, Hynniewtrep National Liberation Council (HNLC) bobil dolna gisik ra·atpiltaianiko on·angaha.
Batanggimin somoirango HNLC bobil dolni sorkari baksa agangrikna on·atgipa chittirango ‘Standstill Agreement’ aro ‘Instrument of Accession’-o pangchakesa agangrikna seatahani gimin ia niamrangara sorkarini ra·chakna man·gijagipa niamrangsa ong·a ine Chief Minister, ia niamrangko den·galpile gital chittiko seattaichina didiataha.
HNLC bobil dol agangrikna re·baengon, so·sojengjeng ong·atani kamrangko dontongchengna nanggen aro a·songni dongimin niamrango pangchakesa agangrikna nanggen ineba Chief Minister parakataha.
Chief Minister-ni parakatani gitade, iani bidingo sorkari, HNLC bobil dolna u·iatmanaha aro HNLC dolni gitaba sorkarina seattaina sienga ine uamang koborko man·soahachim.
“A·bachengo chingni agangimin gitan uamang (HNLC) sorkari baksa agangrikna sikenga ong·ode skanggipa so·sojengjeng ong·atani kamrangko dontongchengna nanggen aro agangrikanio uamangni maming niamrang dongna nangjawa indiba a·songo dongimin niamo pangchakesa ong·na nanggen,” ine Chief Minister parakataha.
