SHILLONG: Meghalaya a·dokni Power department-o tangka jakkalsretani aro dingtang dingtang kamrangko ka·anio dakgualanirang bang·a ine matnanganirangko am·sandiengon, ia am·sandiani ba inquiry-ko dakani bakan matchotgen ine a·dokni Power Minister James K Sangma, an·tangni ka·dongchakenganiko parakataha.
Power Minister-ni parakatani gitade, maiba kamrangni bidingo matnanganirangko man·e inquiry-rangko dakon, dingtang dingtang kamrangko ka·na nange somoirangkode nangrongaiachim.
“Power department-ni kamrangko am·sandienggipa inquiry committee bakan kamrangko matchotgen ine chinga ka·dongenga. Inquiry-rangko dakanio dakna nanganirang bang·ani gimin somoikode nangaia aro iani giminsa uamang somoiko nangkuenga. Indiba angni agangimin gita ia inquiry-ko bakan matchotgen ine chinga ka·dongenga,” ine Sombar salo, a·dokni Power Minister James Sangma parakataha.
Bijoli bikotgipa company-rangna sorkari grorangko chotmanaha aro 2020 March-na skang bangki dongkuenggipa grorangkoba Atma Nirbhar loan-ni gnigipa bakko man·soahaon ia grorangko chotgnok ineba Power Minister parakataha.
Sangma-ni parakatani gitade, grorangko North Eastern Electric Power Corporation (NEEPCO), NTPC Ltd aro Power Grid Corporation of India Limited (PGCIL)-ko man·chape dingtang dingtang bijoli bikotenggipa company-rangko chote on·anggen.
Loan-ko ra·anio dakna nanggni kamrang namen bang·ani gimin ia grorangko chotanio ja·manchakgenchimoba ia company-rang ma·sichakgen ineba Sangma, an·tangni ka·dongchakenganiko parakataha.
