SHILLONG: West Garo Hills a·jani Tikrikilla police station-ni ning·o donggipa Menggotchigre songo joloniko Police-rang, 120 Bn CRPF-ni sipairang baksa gopretna jakkalgipa bosturangko man·ani ja·mano a·dokni pilak biaprangon iandakgipa kamrangko champengna police-rang bilake nirok sandianirangko dakenga ine a·dokni Chief Minister Conrad K Sangma parakataha.
West Garo Hills a·jao bretatna jakkalgipa bosturangko man·taiani gimin janapatengon, “A·dokni manderang naljoke dongna man·na gita intelligence-rangni u·iatanio pangchake pilak a·jarangon apsan dakgipa kamrangko police-rang ka·enga,” ine Chief Minister parakataha.
Manderangni naljokanina rakbee kamrangko ka·enga ineba ua West Garo Hills a·jani police-rangko mittelpilataha.
Sukrobar salo West Garo Hills a·jani police-rang, 120 Battalion CRPF-ni sipairang baksa nangrime sandienba, Tikrikilla Police Station-ni ning·o donggipa Menggotchigre song joloniko IED ge·gni aro gopretna jakkalgipa gipin bosturangko a·ningo dape donako man·ahachim.
Police-rangni u·iatani gitade, ia bosturangara bobil dake chakatgipa gitcham dolrangnichimma ma da·o gital dake bikottaina jotton ka·enggipa dolrangni bostuchimmna uamang maming kobor dongkujaenga.
