M’laya-o MDA sorkarian nambatgipa sorkari ong·enga: Conrad a·kanga

SHILLONG: Sukrobar salo Opposition Congress dolni dingtang dingtang MLA-rang, National People’s Party (NPP)-chi dilenggipa Meghalaya Democratic Alliance (MDA) sorkariko matnanganirangna aganchakaniko on·angengon, da·o dipet Meghalaya a·doko MDA sorkarian nambatgipa sorkari ong·enga ine a·dokni Chief Minister Conrad K Sangma a·kangataha.
Assembly-ni Autumn Session-ko ong·atanio Opposition Congress dolna aganchakaniko on·angengon, MDA sorkari pilak kamrangon apsan chanchirime kamko ka·gipa sorkari ong·a aro ku·cholsan chanchirime kamko ka·aniosa bebera·gipa ong·a ine Chief Minister parakataha.
Gitcham sorkari baksa MDA sorkarini kamrangko tosusae aganangengon, Congress sorkarini somoio dingtang dingtang project-rangko ra·gatahaoba tangka paisarangkode chamskaja aro ia project-rangko da·o MDA sorkarisa chu·sokatenga ine Sangma a·kangataha.
Chief Minister-ni aganani gitade, 2022 bilsio matchotna sienggipa gital Assembly building-koba gitcham sorkarirang indita bilsirangna rikninggija dongahachim aro da·o MDA sorkarisa rike matchotatna siengaha.
MDA sorkarini kamrangni gimin aganangkuengon, 2017-18 bilsirango a·doko dingtang dingtang kamrangna koros ka·ani gong kror 9000-mangsan ong·aiachim indiba 2020-21 bilsio koros ong·ani gong kror 14,000-ona tang·doangaha ine Chief Minister parakataha.
Chief Minister-ni parakatani gitade, MDA sorkari tangka paisarangko name jakkalahani a·selsa da·o Externally Aided Project ba gipinrangoni tangka paisani gita dakchake on·aniko man·aniba gong kror 8000-na batengahachim.
“Batanggimin somoirango ong·anggimin sorkarirang, game ge·e cha·enggiparangni namgnina chanchijachim indiba MDA sorkari, game ge·e cha·enggiparangni namgnina chanchie Farmers Collectivisation for Upscaling Production Marketing System (FOCUS) program-ko a·bachengataha,” ineba Sangma aganaha.
Indake ong·engon, Congress sorkarini somoio dingtang dingtang program-rang, jekai Organic Mission, Agar Mission, Livestock Mission aro uandakgipa program-rangko a·bachengateba, ia program-rangko matchotatchipjahani gimin ua gitcham sorkariko matnangataha aro ia kamrangko da·o MDA sorkarisa jako ra·e chu·sokatskaengaha ine parakataha.