TURA: Garo Hills Autonomous District Council (GHADC) Chief Executive Member (CEM) Benedic R Marak, Sukrobar salo Council-o kam ka·giparangni jabrini dormahako on·na chanchienga ine parakataha.
Adita krorni tangkako a·dok aro revenue generation-oniko Council-na chamatgipaoniko on·gen.
Sukrobar salo Assembly session matchotani dikdiksa ja·man, Benedic Marak, Deputy CEM Nikman Ch Marak aro chairman Rakesh A Sangma- uamang baksa Shillong State Secretariat Office-o Chief Minister Conrad Sangma-ko grongaha.
“GHADC-a tangka chamata aro revenue generation ba uandakgiparangni bidingo u·iate segipa chittiko on·aha. Transport aro Forest-oniko council-na chamgipa royalty-ni bakko man·soaha, jekon kam ka·giparangna dormahako on·na jakkalskagen ine CEM aganaha.”
Minggipin CEM, badita royalty-ko man·na nangkuenga iani gimin chong·mot hisapkode on·a dongja indiba council department-oniko man·gipa revenue ba kajinako kam ka·giparangna dormahako on·gen ine ka·dongataha.
Iana skangba Council, employee ba kam ka·giparangna jasani dormahako on·na aganahachim indiba employee-rang suk ong·jae jegaltokaha.
