TURA: West Garo Hills a·jani a·kawe jolo donggipa Chibinang jolrango namroro silroroaniko ra·bachina didie Garo Students Union (GSU) Chibinang regional unit-ni dilgiparang, Phulbari-ni MLA SG Esmatur Mominin-ko gronge memorandum-ko on·angaha.
Iani bidingo Phulbari-ni MLA-na sedoatengon, Chibinang-oni Bikonggre-ona dakanggipa ramako tarichina aro ia ramako somoi gita matchotatchina GSU Chibinang unit didiangaha.
Chibinang, Chandigre, Mronggre, Kama Boldakgre, Rongchandalgre, Bikonggre, Jangrapara, Sotmarenggre, Renigre, Galwanggre, Durigre, Kangkaronggre, Naljokgre aro uandakgipa songrangni namgnina Chandigre jolo police outpost-ko songchina gitaba GSU dabiangaha.
“Ia sal somoirango ong·gija dakanirang aro manderangoniko ra·seke ra·anirang batroroengon, ia jolrango police outpost dongkujae manderang neng·nikanirangko man·tokna nangenga maina ia songni manderang kam mingantinade Phulbari Police Station-ona re·na man·ja aro ia police station-ona re·anio bang·a somoirangko nangronga. Uni gimin Chandigre jolo police outpost-ko kulie on·na man·genchimode ia jolrango songdongenggipa manderangna naljokanirangko on·na man·gen,” ine Phulbari MLA-na sedoatgipa chittio GSU Chibinang regional unit-ni general secretary Kengkrong B Sangma parakataha.