TURA: Garo Hills-ni primary health centre (PHC)-rango sanna banani cholrang chu·ongjaengani a·sel manderangko sanna bananio neng·nikanirangko man·na nangenga ine Bharatiya Janata Party (BJP) Tura City District Committee (TCDC) parakatenba, ia PHC-rangko namdapatchina gita West Garo Hills a·jani Civil Surgeon (CS)-na sedoataha.
BJP-TCDC-ni general secretary Wilver Danggo-ni parakatani gitade, adita salrangna skang BJP-ni dilgiparang, Asanang aro Darengre PHC-rangona re·ange nion, ia PHC-rango nangchongmotgipa sanna banani cholrang, jekai TT injection aro uandakgipa gipin samrang dongja ine nikna man·ahachim.
Adita salrangna skang, Asanang-o a·sel ong·e mande saksa sina nangahani gimin aro adita sak manderang saknaanirangko man·na nangahani gimin janapatengon, saknaa man·gipa manderangko sanna gita Asanang PHC-ona ra·angon, ia health centre-o nangchongmotgipa sanna banani cholrang dongjani a·sel saknaa man·gipa manderangna sannanirangko on·na man·jaha ine Danggo parakataha.
Darengre PHC-ni gimin janapatskaengon, ia health centre-oba sanna bannani cholrang chu·ongja baksana nokni obostarangba namsrangjaha ine BJP-ni dilgipa talatangenba, ia PHC-ko ta·raken taridapchina West Garo Hills a·jani CS-ko didiataha.
Indake ong·engon, Tura Civil Hospital-ni septic tank bretenba, ia septic tank-ni moilarang, ka·mao donggipa rama aro manderangni dongchakgipa nokrangonasa jokange manderangna neng·nikanirangko on·enga ineba BJP-TCDC-ni general secretary parakataha aro ta·raken ia septic tank-ko taridapchina didiataha.
