SHILLONG: Re·anggipa August jao HNLC bobil dolni gitcham general secretary Cheristerfield Thangkhiew-ko so·otanio jak donggipa police officer-rangko ta·raken kam dontongatchina dabie Sukrobar saloba, ‘Sur ki Nong Mawlai’ ba Mawlai jolo songdongenggipa manderangni ku·rang dolni gita, Shillong songjinmani Secretariat mikkango jingjengatangtaiaha.
Ia jingjengataniko KSU, HNYF aro FKJGP dolrangni dilanichi ong·atangaha, jeon dingtang dingtang dolni membor-rang bakko ra·angenba, sianggipa HNLC-ni gitcham dilgipana kakket bichalko on·china aro uko so·otanio jak donggipa police officer-rangko ta·raken kam dontongatchina dabiangtokaha.
Re·anggipa August jani 13 tariko HNLC-ni gitcham dilgipako so·ote galanio jak donggipa police officer-rangko kamoniko dontongatchina aro sianggipa mandeni nokdangna kakket bichalko on·china dingtang dingtang dolrang dabitokengachim ine nikna man·a.
Ia a·selni bidingo sorkari, judicial inquiry-ko dakchina ge·etmanahani gimin inquiry matchotchenggijade maming ja·kurangko de·na man·kujawa ine adita salrangna skangsan a·dokni Chief Minister Conrad K Sangma parakatskaahachim.
Sianggipa mandena kakket bichalko dabianio KSU, FKJGP aro HNYF dolrangsa mongsonggipa kamko ra·gopengaha ine matnangenba, Seng Samla Mawlai Pyllun, HYC Mawlai Circle, HANM, MPGF, MIPF, UHM, HUAM aro HNYF dolrangde da·o ‘Sur ki Nong Mawlai’ baksa bakrimskajaengahachim ine nikna man·a.
