TURA: Batanggimin sal somoirango, Purakhasia jolo truck garirang baksa a·sel ong·e so·otako man·gipa chadambe sakgnina kalimaniko mesokna aro ia rama gita ro·ong salruraenggipa truck garirangni kosakosa jegalna gita Budbar salo, Greater Purakhasia Area Peace 
Committee-ni gita jinma tom·bimonge re·jomaniko ong·atangaha.
Adita salrangna skangsan, Dalu-chipakni Mahendraganj jolchipakna ro·ong salangenggipa truck gari bolsa, Purakhasia jolo donggipa Kotchuadok songni bilsi 5 ong·kuenggipa Laksbath Sangma-ko saldape siatahachim aro una skang, Tura-oni songtang Purakhasia-ona motor bike-o re·angenggipa chadambe Amsrang R Marak-ko ro·ong salgipa truck garian su·gake siatahachim.
Indake ong·engon, ia a·sel ong·anirangko jegalna gita jinma tom·e re·jomaniko ong·atanio Purakhasia jolo donggipa dingtang dingtang skulni chatro chatrirang, skigiparang, dingtang dingtang mondolini dilgiparang, nokma sanerang aro dingtang dingtang NGO-rangba bakko ra·angaha aro tom·anio sak 3000-na batpile manderang jinma tom·daktokaha.
Ia tom·anio dingtang dingtang dilgiparang, jinmana aganprakengon, sianggipa janggirangna kalimpaaniko parakangtokenba, ia rama gita ro·ong salgipa truck garirangni skatang salengani a·sel manderangna kenchakna nangani ong·engani gimin ia rama gita ro·ong salgipa garirangko watjachina sorkario dabiangtokaha.
Ia chadambe sakgniko saldape siatanio jak donggipa manderangko rim·e nanga gita sastirangko on·china gitaba Peace Committee aro dingtang dingtang dolrang dabiangtokaha.
Indake ong·engon, ia a·sel ong·anio sianggipa janggirangna mande ra·pilskaani chin gita aro ia rama gita ro·ong salgipa truck garirangni re·ruraaniko jegalna gita Bristibar salo Purakhasia jolo donggipa pilak skulrangkon salsana chipe dontokgen ine Greater Purakhasia Area Peace Committee u·iataha.
