TURA: Adita salrangna skang, Tura aro Williamnagar-oni Shillong-ona re·angenggipa MTC night bus gari, Nongchram-o a·sel ong·e sianggipa manderangna Garo Students Union (GSU) Khasi Hills Zone (KHZ)-ba kalimpaaniko parakataha.
Ia a·sel ong·anio dakchakanirangko on·ahani gimin Rongjeng aro Nongchram-ni manderangko, dingtang dingtang NGO-rangko, Police department-ko, Mongri Industries Pvt Ltd-ko, Search & Rescue Team-ko aro gipinrangkoba mittelpilangengon, mikkangchi iandakgipa a·sel ong·anirangko champengna man·na gita bus, sumo aro uandakgipa garirangko salgipa manderangni chu ringe salanirangko mikrakbate nirok sandichina gita GSU-KHZ, a·dok sorkariko didiangaha.
Ramarango donggipa mi dokkanrango gari driver-rangna indin cha·ani ringanirangko on·engani a·sel gariko saltimgiparang churangko ringe salna cholrangko man·enga ineba GSU-KHZ, mikkangchi iandakgipa dokkanrangna mikrakatanirangko on·china sorkariko didiangaha.
Gari a·sel ong·anio saknaa man·gipa manderangna gong lak 1.50 ka·e sorkarini on·na manchianikoba GSU-KHZ raken jegalataha aro gari a·sel ong·anio sianggipa aro saknaa man·gipa manderang pilaknan komibeoba lak 5 ka·e on·china sorkario dabiangaha.
“A·sel ong·aniko chagronggipa manderangoni bang·batan chatro chatrirang aro mitamrangde nokdangtangtangko chalaienggiparang ong·achim. Uni gimin ia nokdangrangna gong lak 1.50 ka·e compensation-ko on·anide chu·ongjawa,” ine GSU-KHZ-ni general secretary Fremiush D Sangma parakatenba, komibeoba ia nokdangrangna gong lak 5 ka·e on·na nanga ine sorkario dabiangaha.
Gari a·sel ong·anio saknaanirangko man·e dingtang dingtang hospital-rango sanna bananirangko ra·enggipa manderangna chu·gimik tangka paisarangko gamchina gitaba GSU-KHZ dabiangaha.
