SHILLONG: Re·baenggipa October-ni 30 tariko ong·atna sienggipa Mawphlang Assembly constituency-ni by-election-o susana gita Budbar salo United Democratic Party (UDP)-ni candidate Eugeneson Lyngdoh, an·tangni nomination-ko file ka·angaha.
Ia apsan salon Rajabala by-election-naba NPP-ni candidate Abdus Saleh, an·tangni nomination-ko file ka·angskaahachim.
Mawphlang by-election-na nomination file ka·ani somoio UDP-ni candidate Eugeneson Lyngdoh baksana UDP-ni general secretary Jemino Mawthoh aro gipin UDP-ni gipin dilgiparang, jekai Lahkmen Rymbui, Titosstarwell Chyne aro gipinrangba dongpaaha.
An·tangni by-election-na tarigimin lekkarangko East Khasi Hills-ni DC office-o on·angani ja·man kobor ra·timgiparang baksa agangrikengon, Mawphlang constituency-ni manderang uko UDP-oni susachina nangnikahani giminsa ua ia by-election-o susaenga ine UDP-ni candidate Eugeneson Lyngdoh parakataha.
“Anga UDP-ni candidate ong·e susana gita nomination-ko file ka·manaha aro da·alonin angni politics-ni kamrangba a·bachengaha,” ine Lyngdoh aganaha.
Lyngdoh saksa robol kal·na changgipa mandeba ong·achim aro ua a·doknasan ong·aigija India a·songnaba robolko kal·e on·ahachim.
An·tangni robol kal·ako dontongatna nangani gimin talatangengon, uni pagipa siani ja·man ua robol kal·ako dontonge uni pagipa sagini matchotanggijagipa kamrangko matchotatskana tik ka·aha ine Lyngdoh parakataha.
Indake ong·engon, Mawryngkneng by-election-ode UDP susajawa aro NPP-ni candidate-na chakpaaniko on·skagen ine UDP-ni president Metbah Lyngdoh parakataha.
Meghalaya a·dokni damgittam Assembly constituency-rang, chong·motan Mawryngkneng, Rajabala aro Mawphlang Assembly constituency-ni by-election-ko re·baenggipa October 30 tariko apsan ong·atengachim ine nikna man·a.
Rajabala aro Mawphlang by-election-nade UDP-ni candidate-rangko seokmanaha indiba Mawryngkneng constituency-ni by-election-nade candidate-ko seokskakujaengachim.
Rajabala by-election-o susana gita Congress MDC Ashahel D Shira-na UDP-ni tikitko on·aha aro Mawphlang by-election-na gitcham MLA SK Sunn sagini depante Eugeneson Lyngdoh-na tikitko on·skaahachim.
UDP president-ni parakatani gitade, Mawryngkneng constituency-o UDP-ko dilenggipa manderangan susagija NPP-ni candidate Pyniaid Syiem-na kamko ka·skana tik ka·ahani gimin Mawryngkneng by-election-ode UDP susajana gita tik ka·aha.