TURA: Rajabala Assembly constituency-ni by-election-o susana gita Sombar salo, National People’s Party (NPP)-ni candidate Abdus Saleh, an·tangni nomination-ko file ka·angaha aro uni nomination file ka·ani somoio NPP-ni national president Conrad K Sangma aro NPP-ni gipin dilgiparangba dongpae bak ra·angaha.
Rajabala by-election-ko re·baenggipa October-ni 30 tariko Mawryngkneng aro Mawphlang Assembly constituency-ni by-election baksa apsan ong·atna siengachim.
Da·o dipet ia by-election-na gipin dolrang nomination-rangko file ka·kujaengani gimin NPP-ni candidate Abdus Saleh-an skanggipa nomination file ka·chenggipa ong·aha.
Rajabala by-election-o NPP-ni candidate Abdus Saleh baksana Congress dolni Hashina Yasmin Mondol, BJP-ni Kingstone B Marak aro United Democratic Party (UDP)-ni candidate Ashahel D Shira-ba susana siengachim.
Ia by-election-na Congress dolni tikitko Rajabala-ni sianggipa MLA Dr Azad Zaman-ni jikgipa Hashina Yasmin Mondol-na on·ahani gimin Congress dolni MDC ong·enggipa Ashahel D Shira, UDP dolo napskae ia by-election-o susaenga.
Rajabala by-election-o NPP-ni candidate ong·e susaenggipa Abdus Saleh, Mahendraganj constituency-ni gitcham MLA ong·achim indiba Mahendraganj constituency-ko reserved seat dakani ja·man ua Rajabala constituency-oni susaskaahani ja·man da·ona kingkingan seokako man·taikujaengachim.
2013 bilsini Assembly election-oba ua Rajabala constituency-oni susae Ashahel D Shira-ni jako amako man·aha aro uni ja·man 2018 bilsini Assembly election-oba ua Congress dolni Dr Azad Zaman-ni jako amako man·riktaiahachim.
Ia by-election-o NPP-ni tikitna adita sak manderang susaahaoba tikitko Saleh man·rikskaaha aro uandaken ia chango ua NPP-ni tikitchi susaskana siengachim.
