RESUBELPARA: Gisikni gita an·seng baljoke dongna nanganiko manderangna talate on·na miksonganio World Mental Health Day-ko Bristibar salo, North Garo Hills a·jani Mendipathar College-o maniangaha.
Ia World Mental Health Day-ko October-ni 10 tarikosa manironggenchimoba ia bilsio ia tarikara Robibar salosa ga·akani gimin ia salko Bristibar salo, District Mental Health Programe (NHM) aro North Garo Hills a·jani District Legal Services Authority (DLSA) manidilangaha.
Ia salko manianio North Garo Hills a·jani Deputy Commissioner RP Marak, chatro chatrirangna aganprakengon, ia sal somoirango gisikni gita an·seng baljoke donganiara pilak biaprangon dal·bea ra·biani gita ong·enga aro gisikni gita saenggipa manderangoni mitamrangsan, namgipa sanna bananirangko man·enga ine an·tangni suk ong·gijaniko parakangaha.
Uandaken gisikni gita an·seng baljoke donganiko pilaknan u·iatna nangenga aro iandakgipa manderangna nanga dakchakanirangko on·na nangenga ineba Marak aganaha.
Ia tom·anio North Garo Hills a·jani ADC ZJ Sangma-ba dongpae jinmana aganprakengon, noktangtangomangba gisikni gita saenggipa manderangko pangnan nichanggalrongenga, uni gimin iandakgipa manderangko galchipaigija nanga gita dakchakanirangko on·na ja·kurangko de·na nangchongmota ine parakataha. Iandakgipa manderangko simsak nirokanide noktangtangonin a·bachengna nanga ineba Sangma aganaha.
Ia program-ko ong·atani bak gita dingtangmancha Mental Board-ni IEC Board-ko aro 60099441122 helpline nombor-ko Deputy Commissioner-ni jakchi a·bachengate on·angjolaha.