TURA: ANM aro GNM-ni porikkako Shillong-o ong·atna gita sorkarini u·iatmanahani gimin Garo Graduates Union (GGU), suk ong·gijaniko parakatenba, ia porikkako Garo Hills-ni candidate-rangnade dingtang Tura-o ong·atskachina gita Meghalaya a·dokni Chief Minister Conrad K Sangma-ko didiataha.
GGU-ni parakatani gitade, ANM aro GNM porikkako re·baenggipa December jani 4 tariko ong·atna siengon, ia porikkako sena sienggipa Garo Hills-ni candidate-rangkoba man·chape a·dok gimikni candidate-rangkon, an·tangtangni dorgastorangko Shillong songjinmani Laitumkhrah-o donggipa Health Services-ni Director-o on·echina gitasa sorkari u·iataniko on·manahachim.
Dorgastorangkosan ong·aigija porikkarangkoba Shillong songjinmani damgittam centre-rango ong·atgen ine sorkari u·iatanio parakatahachim.
Indake ong·engon, iandakgipa porikkarangko sena aro uandakgipa kamrangna Shillong-ona doangna nangrongengani a·selan Garo Hills-ni chatro chatrirang, tangka paisani gita aro dingtang dingtang neng·nikanirangko chagrongna nangrongenga ine GGU parakatenba, Garo Hills-ni candidate-rangnade ia ANM aro GNM-ni porikkarangko Tura-on ong·atchina gita Chief Minister-ko didiataha.
“Chinga iandakgipa u·iataniko niksoe namen duk ong·a aro iako raken jegalenga. Maini gimin dorgastorangko ra·chakna aro porikkako sena gitaba Shillong-ni centre damgittamkosan seokaha? Maini gimin Garo Hills-ni candidate-rangna Tura-o dingtang centre-ko kulina man·jaenga? Garo Hills-ni candidate-rang pangnan iandakgipa neng·nikanirangko chagrongna nangengoba sorkari, uamangni neng·nikanirangko ma·sichakna gisiko nangjaenga,” ine GGU-ni president Dr MN Sangma parakataha.
Uandaken Garo Hills-ni candidate-rangna dorgasto ra·chakani aro porikka sechakani centre-ko Tura-oba kulie on·china gita GGU, a·dok sorkariko didiataha.
Garo Hills-oni porikka seanio chu·sokgipa candidate-rang donggenchimode, ia candidate-rangna personal interview ba viva voce-ko Tura-on ong·atchina gitaba GGU dabiangaha.