TURA: Re·baenggipa October 30 tariko ong·atenggipa Rajabala Assembly by-election-na kamrangko ka·soanio dingtang dingtang political dolrang, COVID-19-ni niamrangko aro Model Code of Conduct (MCC)-ko pe·enga ine koborrangko man·soahani gimin Mongolbar salo West Garo Hills a·jani District Election Officer (DEO), 47-Rajabala (Gen) Assembly Constituency-ni General Observer baksa dingtang dingtang political dolni dilgiparangko okame DRDA hall-o tom·aniko ong·atangenba, ia by-election-na kamrangko ka·anio dongimin niamrangko pe·jachina gita mikrakataniko on·angaha.
Ia tom·anio West Garo Hills a·jani District Election Officer Ram Singh, dingtang dingtang political dolni dilgiparang baksa chanchirimangengon, Election Commission-ni dongimin niam gita by-election-o susaenggipa candidate-rangko man·chape pilak political dolrangan COVID-ni niamrangko ja·rikna nangchongmota ine talataniko on·angaha. Ia by-election-na campaign-ko ka·engon, COVID-ko warachakna dongimin niam gita manderangko jinma tom·bimongna on·jachina aro tom·anio saksa sakgipinoni chel·grike donganiko rakkichina gitaba ua, dingtang dingtang political dolrangko didiangaha.
By-election-na campaign-ko ka·engon, 50 percent-na bate manderangko tom·na on·jachina aro mask-rangko ganan baksana saksa sakgipinoni chel·tanggrike dongchina gitaba ua didiangaha.
Gipin biaprangoni campaign ka·na re·bagenchimode sak 1000-na batgija manderangko tom·na on·skachina gitaba District Election Officer, dingtang dingtang poltical dolrangna ku·pattianiko on·angaha.
Nokprakprakchi re·e campaign-ko ka·engon, sakbongana bate re·jachina ua didiangaha indiba road show ba jinma re·jomanirangkode ua raken champengatskaaha. Tom·anirangko ong·atengon, attam 7:00 bajina bate on·atjachina gitaba ua didiangaha.
Ia tom·anio Rajabala by-election-ni Generaln Observer Sandesh Nayak-ba, political dolni dilgiparang baksa agangrikengon, ia by-election-ko tom·tomao aro nama bewalo matchotatna man·na gita COVID-19-ni niamrangko aro ECI-ni dongimin niamrangko ja·rikchina didiangaha.