TURA: By-election-na jinma tom·anirangko ong·atanio COVID-19-ni dongimin niamrangko ja·rikchina aro manderangko bang·e tom·bimongna on·jachina gita Election Commission, dingtang dingtang political dolrangna mikrakataniko on·angani ja·manoba Robibar salo, Rajabala Assembly constituency-ni ning·o donggipa Bhaitbari songo Congress dolni tom·aniko ong·atanio ia niamrangko manigija manderangni chakpilgija tom·dakaniko nikna man·taiaha.
Re·baenggipa October 30 tariko ong·atenggipa Rajabala Assembly by-election-na kamrangko ka·soanio dingtang dingtang political dolrang, COVID-19-ni niamrangko aro Model Code of Conduct (MCC)-ko pe·enga ine koborrangko man·soahani gimin adita salrangna skangsan, West Garo Hills a·jani District Election Officer (DEO), 47-Rajabala (Gen) Assembly Constituency-ni General Observer baksa dingtang dingtang political dolni dilgiparangko okame DRDA hall-o tom·aniko ong·atangenba, ia by-election-na kamrangko ka·anio dongimin niamrangko pe·jachina gita mikrakataniko on·angahachim.
Election Commission-ni dongimin niam gita by-election-o susaenggipa candidate-rangko man·chape pilak political dolrangan COVID-ni niamrangko ja·rikna nangchongmota aro ia by-election-na campaign-ko ka·engon, COVID-ko warachakna dongimin niam gita manderangko jinma tom·bimongna on·jachina aro tom·anio saksa sakgipinoni chel·grike donganiko rakkichina gitaba DEO, dingtang dingtang political dolrangko didiangahachim.
Indake ong·engon, Robibar salo Congress dolni dilgiparang, uamangni candidate Hashina Yasmin Mondal-na campaign-ko ka·na gita Bhaitbari songo tom·aniko ong·atangon, ia tom·bimonganio bang·bea manderangni maming niamrangko ja·rika gri bak ra·aniko nikna man·taiaha.
Ia tom·bimonganio a·dokni gitcham chief minister aro Congress Legislature Party (CLP)-ni dilgipa Mukul Sangma aro Congress dolni gipin dilgiparangba bakko ra·angaha.
