SHILLONG: Meghalaya a·dokni ramarango donggipa health centre-rangko NPP aro UDP dolrang ATM gita jakkalenga ine MPCC-ni president Vincent H Pala-ni matnanganiko Health department aro District Election department dolgnian dingtang dingtang inquiry-ko dake jegalattokaha.
Bristibar salo a·dokni Chief Electoral Officer (CEO) FR Kharkongor-ni parakatani gitade, Congress dilgipani matnanganiko Returning Officer-rang aro DHS (MI) Dr Aman Warr-ba dingtang inquiry dakahachim indiba dolgnian ia matnanganiranga kakket ong·ja ine nikna man·aha.
District election official-rang aro Returning Officer, songbadrango janapgipa health centre-rangona re·ange am·sandianirangko dakaha indiba iandake matnanganiranga kakket ong·ja ine nikna man·aha ine CEO parakataha.
CEO-ni parakatani gitade, an·o donggipa me·chikrang an·pakna gita hospital-rangona re·baon ia me·chikrangna health department-ni gita tangka paisarangko on·rongani giminsa ian ma·sisretani ong·ahakon ine Health department-ni report-o parakaha.
“Health department-ni gita an·o donggipa me·chikrangna, an·pakna re·baani somoirango uamangni account-rango adita tangkarangko chipatronga indiba ian election-na skangonin ong·baengahachim,” ine Kharkongor parakataha.
Congress sorkarini somoiode da·o gita tangka paisarangko jakkalsreta dongjachim indiba da·ode COVID-19 centre-rangko UDP aro NPP dolrang, ATM gitasa jakkalskaenga ine adita salrangna skangsan MPCC-ni president matnangatahachim.
