SHILLONG: Re·anggipa Sonibar salo ong·atanggipa Meghalaya a·dokni damgittam by-election-o dingtang dingtang dolrangba chena gita ka·dongsotokengon, ia by-election-o vote-rangko man·na gita tangka paisarangko manderangna sualaha ine Congress dol, gipin dolrangko matnangskaaha.
Meghalaya Pradesh Congress Committee (MPCC)-ni working president Ampareen Lyngdoh-ni aganani gitade, ia damgittam by-election-o Congress dol cheani cholrang dongengachim indiba ia damgittam constituency-rangon gipin dolrang tangka paisarangko sualahani gimin Congress dol adita jajrengchakaniko man·enga.
Iandake tangka paisarangko sualaniara 2023 bilsini Assembly election-na namgija chanchianiko ong·atgen ine janapatengon, “Sorkariko chalaienggipa dolrangoni iandake tangka paisarangko suale election-ko chena jotton ka·aniara namen chanchisokgijaniko ong·ataha. Batanggimin somoirangoba chinga iandakgipa obostarangko chagronga dongkujachim,” ine Lyngdoh aganaha.
Ia damgittam by-election-rangko MDA sorkariko chalaienggipa National People’s Party (NPP) aro United Democratic Party (UDP) dolrangba chena ka·dongtokengachim.
“Chinga damgittam constituency-rangkon chena ka·dongenga. Ia biap damgittamoniko chinga report-ko man·soahaon chingni cheani cholrangko name ma·sibatgnok,” ine NPP-ni national vice president Prestone Tynsong parakataha.
UDP-ni president Metbah Lyngdoh-ba Mawphlang aro Rajabala constituency-rango chegipa ong·na ka·dongenganiko parakataha.
“Mawphlang-ode chinga chegipa ong·telgen ine anga namen ka·dongenga. Indiba ia biap damgittamoniko chu·gimik koborrangko man·soahaon gipin biap damgnini giminba aganna man·gnok,” ine Lyngdoh aganaha.
