TURA: Garo Hills-ni ning·o donggipa B Mahal aro A Mahal-ni bidingo Garo Hills Autonomous District Council (GHADC)-ni chief executive membor (CEM) Benedic R Marak-ni talate on·aniko rongtalja ine Pedaldoba-ni GSMC aro Raksamgre-ni GSU dolrang jegalatenba, ru·uta bilsirangna skangan Bijini zamindar-rangde Garo Hills-o napdrae songdong a·chagiparangsa ong·ani gimin ia a·arangni nokgipa ong·na man·ja ine parakatskaaha.
Ia dolgni NGO-rangni parakatani gitade, Garo Hills-ni salgro simarango donggipa Karaibari, Mechpara aro Kalumalupara songrangara A·chikrangni songdongchenggipa biaprangsa ong·a aro iana A·chikrang 1793 bilsio dingtangmancha kajinarangkoba gamahachim.
Indake ong·genchimoba, 1794 bilsirangosa East India Company-ni Permanent Settlement aro kilkrana monopoly-ko a·bachengatani ja·man A·chikrangni songdong a·chaaniko pripraatna a·bachengaha aro A·chikrangni kosako sinjetaniko on·na a·bachengaha ine NGO-rang parakataha.
“Ua (Benedic) ia biapo Solar Park aro Meghalaya Battalion Camp-ko songna manchienggipani giminsan talate on·aiaha indiba One Time Settlement aro B Mahal-ni a·arangko Israel-ni company-na pale cha·na miksongenggipani giminba mamingkoba janapjaha. B Mahal-o songdongenggipa nokdangrangna ua bigha 2-kosan on·e ia biapo songdongenggipa manderangko gong 40,000-ko GHADC-na gamchina ge·etaha,” ine dolgni NGO-rang parakatenba, ia jolrango namroro silroroaniko ra·bana gitade ua B Mahal-ni a·arangko palna miksongenga ong·ja indiba an·tangni man·gninasa ia a·arangko palna miksongenga ine parakataha.
