TURA: Re·anggipa Sonibar salo ong·atanggipa Meghalaya a·dokni damgittam by-election-ni result-rangko da·al Mongolbar salni bako parakatna siengahaon, ia by-election-o susaenggipa dingtang dingtang candidate aro political dolrangan chegipa ong·na ka·dongsoenganiko paraktokskaaha.
Meghalaya a·dokni damgittam Assembly constituency-rang, chong·motan Rajabala, Mawryngkneng aro Mawphlang constituency-ni by-election-ko re·anggipa Sonibar salo ong·atangahachim aro ia damgittam by-election-o pu·onani gimik 83.67 percent gapahachim. Ia by-election-o Rajabala constituency-o pu·onani 90.63 percent bang·batgipa ong·aha ine uni ja·man Mawphlang constituency-o 82.34 percent aro Mawryngkneng constituency-oba pu·onani 78.06 percent ong·skaahachim.
Indake ong·engon, ia damgittam by-election-ko ong·ataniara MDA-ko dilenggipa NPP aro MDA-o bakrimenggipa UDP aro BJP baksana Congress dolnaba dake niani ong·enga ine kobor on·timgiparang parakataha.
2018 bilsini Assembly election-o Mawryngkneng aro Rajabala constituency damgnikon Congress cheahachim aro ia by-election-o Congress dol, ia damgittam constituency-kon chena man·genchimode Assembly-o Congress-ni seat-ba dam 20-ona tang·doangpilgnokchim. Mawryngkneng aro Rajabala constituency-ni Congress MLA sakgnian ia bilsini a·bachengachibara siangahani gimin ia by-election-ko ong·atna nangengachim aro apsan daken Mawphlang constituency-oba gitcham MLA siangahani gimin by-election-ko ong·atna nangahachim.
Politics-ni kamrangko nirikkienggipa mitam manderangni u·iatani gitade, ia damgittam by-election-o NPP, UDP aro Congress dolgittaman seat damprakko chenaba gnang.
NPP aro Congress dolgnian ia damgittam constituency-on susaenga aro MDA-o bakrimenggipa UDP dolba Mawphlang aro Rajabala constituency-rango susaskaengachim.
Rajabala aro Mawphlang constituency-rango MDA-ko dilenggipa NPP aro UDP dolgnian susaengani gimin vote-rang ia dolgnini gisepo pripragenchimode Congress dolnan chol ong·skataenga ineba kobor on·timgiparang parakataha.
Rajabala constituency-o BJP dolba candidate-ko susaatahani gimin da·o MDA-o bakrimenggipa dolrangoni dolgittam susagrikani gita ong·engaha aro ian Congress dolna namgipa chol ong·skaenga ineba mitam manderang aganaha.
Indake ong·engon, da·al salni bako result-rangko parakatani ja·man chegipa candidate ba dolrang, jinma re·jomaniko dakna man·jawa ine Election Commission of India (ECI)-oni u·iataniko on·ataha.
ECI-ni pal Senior PR Secretary Sumit Mukherjee-ni u·iatani gitade, by-election-ni result-rangko parakatani ja·man chegipa candidate ba dolrang jinma re·jomaniko dakna man·jawa aro chegipa candidate-ni Returning Officer-oniko certificate-ko ra·eani somoioba candidate baksa sakgnina bate re·angpana man·jawa.
