TURA: Cha·ue ra·anggipa scooty bolsa aro bike bolsako North Garo Hills a·jani police-rang, dingtang dingtang biaprangoniko man·aha aro bike-rangko cha·uanggipa manderangkoba rim·na man·aha ine kobor on·aha.
Police-rangni kobor on·ani gitade, skanggipao North Garo Hills a·jani police-rang, cha·uanggimin scooty bolsako Bajengdoba joloniko man·aha aro ia scooty-ni bidingo am·sandion, ia scooty-ko 2019 bilsion Tura joloniko cha·uangahani gimin Tura police station-o mokordoma ka·ahachim ine ma·sina man·aha.
Ja·mano ia scooty-ko North Garo Hills a·jani police-rang, scooty nokgipani jako pakwate on·ataha aro ia scooty-ko cha·uanggipa mandekoba rim·e Tura police station-ona pakwatataha ine kobor on·aha.
Minggipin a·sel ong·anio, cha·uanggimin Pulsar bike bolsako mande saksa North Garo Hills a·jani Mendal jolo pale cha·na jotton ka·engachim indiba police-rang bakan ua biapona re·ange ia mande baksana bike-koba rim·ena gita man·aha.
Iani bidingo police-rang am·sandion, rim·ako man·gipa mandeara, Assam aro Byrnihat jolrango bike cha·ugipa dolni membor saksa ong·achim ine ma·sina man·aha aro uandaken ja·mano ia mandeko North Garo Hills a·jani police-rang, Byrnihat police-rangna pakwate on·ataha.
Indake ong·engon, salskuni gisepon cha·ue ra·anggipa bike bolgni aro scooty bolsako man·aha ine police-rang parakatenba, ma·sigijagipa manderangoniko jakkalgimin bike-rangko brena skang, name am·sandichengchina gita jolo songdongenggipa manderangko didiataha.
