TURA: Garo Hills-ni State Highway (SH-12) rama gita Bangladesh a·songona ro·ongrangko salruraengani a·sel ia ramao bang·en a·sel ong·anirangko aro rama jal·langrangni nosto ong·roroangenganiko nikna man·engani gimin South West Garo Hills a·jani dingtang dingtang NGO-rang, songni nokmarang aro jolo songdongenggipa manderang baksa ia rama gita ro·ong salgipa truck garirangni re·ruraaniko jegalna Budbar salo, jinma tom·bimonge re·jomaniko ong·atangaha.
Ia tom·e re·jomaniko South West Garo Hills a·jani GSU, AYWO, FKJGP, AYC, AHAM, GSMC, AAYF, ADE aro uandakgipa dingtang dingtang dolrang nangrime ong·atangaha aro ia tom·e re·jomanio ia ramao donggipa dingtang dingtang songni nokma gaonburarang, me·chikma dolrang, bazar committee-rang, self help group-rang, VEC-rang aro jolo songdongenggipa manderangba bakko ra·angtokaha.
Iani bidingo jolni NGO-rang, dingtangmancha a·dokni Chief Minister Conrad Sangma-naba memorandum-ko South West Garo Hills a·jani deputy commissioner-ni jako on·ataha aro iani bidingo chief minister-na sedoatengon, ia rama gita salantian Bangladesh a·songona ro·ong salruragipa garirang skatang salruraengani a·sel batanggimin somoirango bang·en a·sel ong·anirangko, manderangni sianirangko aro rama jal·langrangni nosto ong·roroangenganiko nikna man·engahani gimin mikkangchi ia rama gita ro·ong salruragipa garirangni re·ruraaniko chu·gimik champengna nangenga ine Ampati-ni NGO-rang parakataha.
“Ia rama gita ro·ong salruraenggipa truck garirang niam gita dongimin metric ton 9-na baten ro·ongrangko salengani a·sel rama jal·langrang nosto ka·ako man·engan baksana manderangni jangginaba kenchakna nangani ong·enga,” ine NGO-rang parakataha.
Indake ong·engon, Garo Hills-o donggipa a·ningni bosturangko iandake salantian gipin biaprangona palgalataiode mikkangchi Garo Hills-o ro·ong an·chengrangkon nikna man·jawaha ineba NGO-rang, iandake Garo Hills-ni gamchatgipa bosturangko gipin a·songrangona palgalaniko champengchina gitaba a·dok sorkariko didiataha.
