SHILLONG: Meghalaya a·dokni deficit skulrango skigiparangko a·dok sorkari, re·baenggipa November 15 tariko apsan agangrikna gita okamataha.
Education department-ni okamatako man·ahani gimin Khasi Jaintia Deficit School Teachers Association (KJDSTA) aro Garo Hills Deficit School Teachers & Employees Association (GHDSTEA) dolrangba kusi ong·aniko parakataha.
Sorkarini agangrikna okamatengani gimin an·tangni kusi ong·aniko parakatengon, “Chinga sorkarini okamaniko ra·chake agangrikna tik ka·aha aro chinga bebera·a ia agangrikanichi chingna namgipa biterangko man·gen,” ine KJDSTA-ni president Babu Kular Khongjirem parakataha.
Deficit skulrango skigiparangnaba kamoni neng·takangani ja·man man·gnirangko on·china, death-cum-retirement gratuity-ko 5th Pay Commission-ni recommend ka·ani gita gong lak 3.5-oniko gong lak 10-ona bariatchina, gital pay scale-ni bangki arrear-rangko on·china, medical reimbursment-ko on·china aro commission-ni recommendation-ko deficit skigiparangnaba on·china gita KJDSTA aro GHDSTEA dolrang dabiengachim ine nikna man·a.
Skigiparangni dabianirangko sorkarini knachakjaengani gimin ia bilsini March jaoba deficit skulrango skigiparang, salgittamna chutti ra·gope jingjengatangahachim ine nikna man·a.
