TURA: Salgittamna West Garo Hills a·jani Babadamgre songo ong·atanggipa Me·gong Festival-ko Sonibar attamo, dingtang dingtang program-rangko ong·ate matchotataha aro ia Me·gong Festival-ona a·songo mingsinggipa Shenaz Treasurywala-ni sokbaanian mikkim 
dongbatataha.
Bon·kamgipa attamo Shillong-oni ‘Soulmate & The Clansmen’ baksana Tura-oni ‘Fame the Band’ dolrang ga·subee gitrangko ring·e mesokangaha aro bon·kamgipa attamo manderangko an·saoatangbeaha.
Ia Me·gong Festival-ko Bristibar salo a·bachengataonin, dingtang dingtang program-rang, jekai chu tarisusaani, jatni kal·susaani, dingtang dingtang dolrang chrok mesaani aro uandakgipa program-rangko nikangna gita man·ahachim.
Ia festival ba manianio dingtang dingtang songrang jekai, Gondenggre, Sadolpara, Marakkapara, Selbalgre aro uandakgipa songrangoni chu bitchi aro dikkarangko manderang ringe nina gitaba cholrangko man·aha aro uarangsan ong·aigija Arunachal Pradesh, Sikkim aro Assam a·dokrangoniba re·bae, an·tangtangni jakchi tarigimin cha·ani ringanirangko mesokna gita cholrangko man·aha.
Skanggipa attamo, Nokpante aro Katta dolrang, gitrangko ring·e manderangko an·saoatangaha aro gnigipa attamoba Da Suraka aro Shillong-oni Meba Ofillia dolrang gitrangko ring·e mesokangskaaha.
Ia salgittamna ong·atanggipa Me·gong Festival-o a·gilsako mingsinggipa Lagota Circus-ni dakmesokanirangkoba nikangna gita man·aha.
Ia Me·gong Festival-ko Bristibar salo do·ga oe on·angani somoio, Chidekgre-o rikenggipa Tribal Research Institute (TRI)-ko re·baenggipa 2022 bilsini September 1 tarikode nokdonggae on·angna siengahani gimin ia Me·gong Festival-koba mikkang bilsionide ia Institute campus-on dal·bate ong·atangskagnok ine a·dokni Chief Minister Conrad Sangma parakataha.