TURA: UPSC, MPSC, SSC, Banking aro uandakgipa porikkarangko sena sikenggipa chadamberangna, West Garo Hills District Administration aro Tura-ni Don Bosco College nangrime, Career Guidance program-ko ong·atangaha aro ia program-ko ong·atanio West Garo Hills a·jaoni gimik sak 120-mangni gita chatro chatrirang bakko ra·angaha.
Ia Career guidance program-ko ong·atanio West Garo Hills a·jani Deputy Commissioner Ram Singh, jinmana aganprakangengon, iandakgipa competitive porikkarangko ong·atanio pangnan an·tangtangni tarisamsoe sechina gita program-o bak ra·gipa chatro chatrirangko didiangaha. Tura-o aro Garo Hills-o iandakgipa porikkarangko sechakani centre-rang dongjani gimin pa·sike dongaijachina gitaba ua chatro chatrirangko didiangaha.
Chatro chatrirang, dingtang dingtang porikkarangko sena gita an·tangtangko tarisamsona man·na gita orientation program-ko ong·atanggen ineba ia tom·anio Deputy Commissioner parakangaha.
Ia career guidance program-ko ong·atanio chatro chatrirangna agan-talate on·anggipa gipin manderangara, Dadenggre-ni SDO V Agrawal aro Election-ni EAC Dimseritha A Sangma ong·a.
