TURA: North Garo Hills aro Assam a·dokni Goalpara a·jarango muga jile cha·enggiparangna re·anggipa Mongolbar saloni a·bachenge re·baenggipa December 11 tarikona training program-ko Mendipathar-o donggipa P-4 Seed Station-o ong·atenga.
Ia training program-ko ma·mong sorkarini Textiles Ministry-ni ning·o donggipa Central Silk Board aro Muga Eri Silkworm Seed Organisation ong·atenga aro ia program-ko Mongolbar salo North Garo Hills a·jani Additional Deputy Commissioner ZJ Sangma, a·bachengate on·angaha.
Ia training program-ko a·bachengate on·anganio North Garo Hills-ni ADC aro DRDA-ni Project Director ZJ Sangma, jinmana aganprakangengon, muga-ko jilanichiba game ge·e cha·giparang, an·tangtangni janggi tangani gadangko tang·doatna man·gen ine jolo game ge·e cha·enggiparangko muga jilani kamrangoba gisik on·china didiangaha.
Ia program-ko a·bachengate on·angani somoio Sangma, ia program-na tarigipa technology booklet-koba oprake on·angjolaha.
Ia tom·aniko Guwahati MESSO-ni Scientist D aro Head P Borpuzar dilangengon, sericulture ba muga kildingko tarianichi manderangna janggi tangani cholrangko on·na man·na aro iani bidingo Central Silk Board, manderangna training program-rangko ong·atenga ine parakangaha.
Ia training program-o dingtang dingtang biaprangoni kam gri ong·e dongenggipa chadamberang aro mugako jilenggiparang gimik sak 20-mangni gita bakko ra·tokenga.
Photo: North Garo Hills a·jao muga jile cha·giparangna training program-ko a·bachengatanio North Garo Hills a·jani ADC ZJ Sangma, jinmana aganprakenga.
