SHILLONG: Meghalaya a·doko skanggipa Inspection & Certification Centre-ko rikna gita Sombar salo, a·dokni Chief Minister Conrad Sangma-ni jakchi pangchakaniko Shillong songjinmani Sawlad-o songe on·angaha.
Ia centre-na pangchakaniko songe on·angani somoio a·dokni Transport Minister Dasakhiat Lamare, a·dokni Chief Secretary Rebecca Suchiang aro Transport-ni Commissioner & Secretary MR Synrem-ba dongpae bak ra·angaha.
Ia Inspection & Certification Centre-ko kuliani bidingo Transport department-ni Commissioner & Secretary MR Synrem, jinmana talate on·angengon, ia centre-ko rikna gita tangka paisarangko ma·mong sorkarini Roads & Highways Ministry, chu·gimikkon dakchake on·enga aro ia centre-ko ja 10-ni gisepon matchotna ka·dongenga ine parakangaha.
Ia centre-ko rikna gita pangchakaniko songe on·angani somoio a·dokni Chief Minister Conrad Sangma-ba jinmana aganprakangengon, ia centre-na tangka paisarangko dakchake on·engani gimin Roads & Highways Ministry-ko mittelpilangenba, mikkangchiba garirangko porikka ra·e nina man·na gita a·dok sorkari, ia apsan dakgipa centre-rangko kulidapangkugen ine parakangaha.
Meghalaya a·doko gari gorarang bang·batrorobaengani a·sel rama jal·langrangsan ong·aigija samtangtango ong·telaigiparangnaba nangchakeaniko ra·baenga ine janapatengon, gari gorarang bang·batrorobaengani gimin a·doko Inspection & Certification Centre-ko kulina nangchongmotenga ine Chief Minister parakangaha.
Automated inspection aro certification centre-ko kulianichi garirangko porikka ra·e niani somoiko bakkandikatna dakchakani ong·gen aro gari gorarangko nambate porikka ra·e nina man·gnok ineba Chief Minister aganaha.
Gari gorarangko somoi gita porikka ra·e nina nangani gimin janapangengon, garirangko porikka ra·e niani dongjani a·selan bang·bata changon garirangni a·sel ong·anirangko nikna man·enga aro garirangko somoi gita porikka ra·e nianichi garirangoni namgijagipa wal·kurangni ong·kataniko champengna man·a ine Chief Minister aganaha.
Ia Inspection & Certification Centre-ko somoi gita matchotatchinaba ua Transport department-ni official-rangko didiangaha.
A·doko skanggipa Inspection & Certification Centre-na pangchakaniko songa
Date:
Share post:
