SHILLONG: Mijal Budbar salo, East Khasi Hills a·jani Mawkynrew block-ni ning·o donggipa Rapleng songo self help group (SHG)-rangni Mela-ko ong·atangaha aro ia Mela-ko ong·atanio a·dokni Chief Minister Conrad K Sangma baksana a·dokni Agriculture Minister Banteidor Lyngdoh-ba dongpae bak ra·angaha.
Ia SHG Mela-ko ong·atanio a·dokni Chief Minister aro Agriculture Minister, Mawkynrew Block-ni ning·o donggipa dingtang dingtang songrangna, dingtang dingtang kamrango chu·sokgipa ong·anina certificate-rangkoba on·angaha aro dol 70 Farmer Producers Group-rangna gimik gong lak 48.55-ni cheque-rangkoba suale on·angaha. Ia Mela-ko ong·atanio Mawkynrew block-ni ning·o donggipa dol 8 Village Organisation-rangna gong lak 22.80-ni Community Investments Fund-rangko aro dol 19 self help group-rangnaba gong lak 27-ni bank loan-rangko Chief Minister-ni jakchi on·angjolaha.
Ia SHG Mela-ko ong·atanio a·dokni Chief Minister, jinmana aganprakangengon, self help group (SHG)-rangko aro game ge·e cha·giparangko tang·doatna gita dingtang dingtang program-rangko ra·gate sorkari, songadam nokadamrango manderangni janggi tanganiko dingtangatna jotton ka·enga ine parakangaha.
Songadam nokadamrango SHG-rangni gamchatgipa ong·aniko ia sorkari ma·sichakengani gimin batanggimin bilsi gittamni gisepon, National Rural Livelihood Mission (NRLM)-chi bang·a SHG-rangna tangka paisarangko on·e dakchakna man·aha ineba Chief Minister parakataha.
Meghalaya a·doko bang·bata nokdangrangan game ge·e cha·giparangsa ong·ani gimin sorkari, dingtangmancha FOCUS program-ko ra·gatenba game ge·e cha·enggiparangna tangka paisarangchi dakchake on·na man·aha ineba ia tom·anio Chief Minister parakataha.
A·doko songdongenggipa manderangna aro mongsongbate songadam nokadamrango nambate manderangna dangdike on·na man·na gita sorkari, a·dok gimikni dam 46 C&RD Block-rangko nambatatna miksongenga ine janapatengon, block ge·antinan sorkari gong kror 3 ka·e tangka paisarangko chamanaha aro kamrangko mikkang bilsioni a·bachengatgnok ine Chief Minister parakataha.
