TURA: Re·anggipa Sombar salo, police-rang am·sandianirangko dakenba, song damgnioniko boma aro adita gulirangko man·aha.
Police-rangni kobor on·ani gitade, Garo Hills-o ong·gija dakgipa manderangni gimin koborko man·soenba, West Garo Hills a·jani police-rang, Tura-oni kilometre 15-mang chel·ao donggipa Du·mangitok songona re·ange, am·sandianirangko dakon, ia songo dape dongipa grenade rongsa aro 7.62 mm guli rongdokko man·aha.
Ia bosturangko man·ani ja·mano police-rang, jolo songdongenggipa manderangna naljokaniko on·na gita ia grenade bomako kimite galaha.
Indake ong·engon, ong·gija dakgipa manderangni gimin koborko man·soenba police-rang, Dollonggre samba jolo donggipa Rechangre songona re·ange am·sandianirangko dakon, ia songo donggipa Hume pipe culvert ning·o donanggipa jolongga tangsekoniko IED boma ge·gniko man·aha ine kobor on·aha.
Ia IED bomarangoni ge·sako pressure cooker-o aro ge·gipinko tin-ni bakoso chipe donangahachim.
Ia IED boma ge·gnini jreani Kg 10-mang ong·a ineba police official-rang parakataha.
Ia a·selrangni bidingo police-rang, mokordomako segatenba, am·sandianirangko dakna a·bachengataha ineba kobor on·aha.
