NEW DELHI: Game ge·e cha·giparangni jingjengatengmiting somoio uni uko gronge agangrikani somoio a·songni Prime Minister Narendra Modi, ‘bilongen ka·ting’ dake mesokaha ine Meghalaya a·dokni Governor Satya Pal Malik matnangataha.
Malik-ni parakatani gitade, game ge·e cha·enggiparangni namgninasa ua Prime Minister baksa agangrikna re·angahachim indiba uamang sakgni jegrikesa bon·aiahachim.
“Chingni minute bongana tom·e agangrikanio ua bilongen ka·ting dake mesokaha,” ine Robibar salo Malik, Haryana a·dokni Dadri-o ong·atanggipa tom·anio aganaha.
Malik-ni iandake matnangatani ja·man bakan opposition Congress dol, uko ‘ka·ting’ daka ine matnanggipani bidingo Prime Minister-ko sing·doatskaaha.
“Ua namen ka·ting dake mesokaha. An·chingni a·songo sak 500 game ge·e cha·giparang sina nangaha ine anga una aganon, ‘uamang angnasa siahama?’ inesa ua angko aganchakpilaha. Uni gimin angaba ‘na·an raja ong·ani gimin oe ong·a’ ine aganskaaha. Anga unbaksa jegrikesa bon·aiaha. Ua Amit Shah-ko grongchina angko aganahani gimin anga Amit Shah-ko grongeskaaha,” ine Meghalaya Governor aganaha.