SHILLONG: East Jaintia Hills a·jani Iapmala songo wak be·en cha·ani ja·man komibeoba sak 160 manderang saaniko man·aha.
Koborko on·ani gitade, Iapmala songo gital bilsiko maniani somoio manderang wak be·en cha·ani ja·man chigalna a·bachengtokaha aro Robibar walode diarrhoea saaniko man·tokaha.
Khliehriat CHC-o kam ka·enggipa doctor-rangni u·iatani gitade, komibeoba sak 160 manderangko saa man·ani ja·man hospital-o sanna gita admit ka·aha. Hospital-o done sannaniko man·enggipa manderangoni komibeoba sak 30 manderangde bilongbatenga ineba doctor-rang u·iataha.
Iana kenjagokjachina gita manderangko didiatengon, jinma cha·rim ringrimani somoirango cha·anirangko simsake cha·china aro cha·anirangko name mine song·china gita doctor-rang didiataha.
Jinma ale cha·ani somoio wak be·enko cha·ani ja·manosa uamang sana gita a·bachengaha ine hospital-o donako man·enggipa manderangba parakataha.
Iani bidingo am·sandianirangko dakchina gita East Jaintia Hills a·jani Deputy Commissioner, District Medical & Health Officer aro Food Inspector-ko ge·etangskaaha.
