SHILLONG: Batanggimin bilsibrina Meghalaya sorkariko chalaianio National People’s Party (NPP)-chi dilenggipa Meghalaya Democratic Alliance (MDA), namgipa sorkariko chalaina man·jaha aro bang·bata somoion a·dokko dilsretaha ine Congress dolni state working president PN Syiem matnangataha.
“MDA sorkariko dilenggipa NPP aro MDA-o bakrimenggipa joltangni political dolrang pilak kamrangon chu·sokna man·jahani gimin da·o 2023 bilsini Assembly election-ode a·dokni manderang Congress dolchipakko niatskana nangengaha,” ine Sombar salo, Sohra Block Congress Committee-ni tom·aniko ong·atanio Syiem aganaha.
Syiem-ni aganani gitade, bang·a kamrangon chu·sokgipa ong·enga ine sorkari a·kangengoba kakketode dingtangsa ong·skaengachim.
“Batanggimin bilsibrini gisepo a·dokni manderang aro a·dokba sorkarioniko mamingkon man·dapjaha,” ine Congress dolni dilgipa aganaha.
Jatni dakani rikanirangko aro Tribal-rangni bilko warachakna gita Congress dolsa kamko ka·aha ineba ua a·kangataha.
“BJP a·songko sason ka·angkua ong·ode Tribal jatrangde a·songtangon bilko man·jawaha. Tribal jatrangni daka rikani aro bilrangko chel·chakna dongimin pilak niamrangan bon·atako man·aignok,” ine Syiem aganaha.
