TURA: Tura Civil Hospital-ni dingtang dingtang unit aro ward-rango kam ka·giparang chu·ongjae sanna bananirangko on·anio name kam ka·na man·jaenga ine A·chik Holistic Awakening Movement (AHAM) parakatenba, ia hospital-ni dingtang dingtang unit aro ward-rango kam ka·giparangko rakkidapchina gita a·dok sorkariko didiataha.
AHAM-ni president George Prince Cheran Momin-ni parakatani gitade, Tura Civil Hospital-o Intensive Care Unit (ICU) donggenchimoba ia unit-o kam ka·giparang chu·ongjaengani a·sel kamrangko name ka·na man·jaenga aro uandaken ICU-o doctor sak 4, staff nurse sak 8, ICU technician sak 4, attendant sak 4 aro sweeper sak 2-ko ta·raken rakkidapna nangenga.
Tura Civil Hospital-ni Dialysis unit-ni gimin janapatskaengon, ia hospital-o Garo Hills-ni manderangna name dangdike on·na man·na gita dialysis unit-naba medical & health officer sak 2, staff nurse sak 5, dialysis technician sak 2, attendant sak 4 aro sweeper sak 3-ko rakkidapna nanga ine AHAM didiangaha.
Tura Civil Hospital-o anesthetist-ni kamrangba ge·gni bangbang ong·e dongenga ine janapatengon, ia kamrangko ta·raken gapatchina gita AHAM-ni president, a·dok sorkario dabiangaha.
Tura Civil Hospital-o ja·delgimin aro budepa butchumarangko nambate sanna man·na gita geriatric ward-ko ta·raken kulie on·china gitaba AHAM dabiangaha.
Garo Hills-o skie ra·gimin chadamberang bang·en donggenchimoba Tura Civil Hospital-o laboratory technician-ni post ge·gni da·onan bangbang ong·e dongenga ineba AHAM-ni president parakataha aro ia kamrangko ta·raken gapatchina gita sorkariko didiangaha.
Indake ong·engon, Tura Civil Hospital-oba gipin dal·dalgipa songjinmarango gitan nambate sanna bananirangko on·na man·na gita cardiologist, radiologist, neurologist, oncologist aro uandakgipa kam ka·giparangko rakkidapchina gita AHAM didiangaha.
