SHILLONG: A·songni gipin biaprango gitan ma·manti saanirang donge bilsi 60 batgiminrangna aro mikkango donge sabisiko warachakenggiparangna mijal Sombar sal dipet Meghalaya a·dokoba booster dose ba chel·chakani tikarangko su·na a·bachengataha.
Ia skanggipa salo a·dokni dingtang dingtang tika su·chakram biaprango ia booster dose-ko su·e ra·gipa manderang komiahaoba mikkang salrangode batangnaba gnang ine ka·dongsoenga.
Health department-ni principal secretary Sampath Kumar-ni parakatani gitade, ia booster dose ba chel·chakani tikarangara, mongsongbate a·bachengo ponggni tikarangko su·ani somoirang bang·e dingtanggrikjani gimin skang su·e ra·chenggipa manderangna namen nangbatgipa ong·enga.
Da·o dipet ia booster dose-ko ma·manti saani gnang bilsi 60 batgimin manderangna aro mikkango donge sabisiko warachakenggipa manderangnasa on·engon a·dok gimiko tika su·chakgipa dam 157 centre-rangko donataha aro ia dam 157 centre-rangoni dam 57-de East Khasi Hills a·jao ong·a.
Kumar-ni parakatani gitade, State Medical Expert Committee-ni recommend ka·anio pangchake a·bachengo skang tika su·e ra·gipa manderangsa ia tikako skang ra·chengna gita nangenga.
Skanggipa bako, ma·manti saanirang donge bilsi 60 batgimin manderangna sorkari ia booster dose-ko on·enga aro iandakgipa manderangna nokantichi re·eba samrangko on·na miksongenga ineba Health official parakataha.
