SHILLONG: Assam aro Meghalaya a·dok damgnini simarango meligrikgijaniko namatna kam ka·anio NPP-chi dilenggipa MDA sorkario bak ong·paenggipa United Democratic Party (UDP) dolba Chief Minister Conrad Sangma-ni dilanichi sorkari baksa bakrimangkugen ine Robibar salo parakataha.
“Assam a·dokni simarango meligrikgijaniko namatna gita chingaba kamrangko nie dongenga. A·dok damgnini simarango meligrikgijaniko namatna gita ia sorkari, ja·kurangko de·engani gimin chinga kusi ong·a,” ine Robibar salo, UDP-ni president Metbah Lyngdoh, kobor ra·timgiparangna aganaha.
Ia bilsio Meghalaya a·dokni bilsi 50 gapaniko maniengon, a·dok damgnini simarango meligrikna man·jaenggipa biaprangoni damdok biaprangko namatna ja·ku de·aniara a·dok damgnini simarango meligrikgijaniko namatna gita ia sorkarini gisiko nanganiko mesokani ong·enga ineba ua aganaha.
Indita bilsirangni ja·manoba a·dokni simarangko sale on·kujaenga ineba ua an·tangni suk ong·gijaniko parakataha.
Lyngdoh-ni parakatani gitade, a·dok damgnini simarango meligrikgijaniko namatchipkujaengani a·selan ia jolrango songdongenggipa manderang neng·nikanirangko chagrongna nangtokenga ine ma·sina nangchongmotenga.
“Uni gimin ia a·dok damgnini simarango meligrikgijaniko namatna gita ja·kurangko de·angkuchina chinga nangnikenga. Ia neng·nikaniko namataniara altua kam ong·jawa indiba anga ka·donga, simarango songdongenggipa manderangni namgnina ia meligrikgijaniko namatna man·gen,” ine UDP-ni president aganaha.
Sorkarini dingtang dingtang kamrangna dongimin bilsiko bariatchina gita UDP, a·dok sorkari baksa agangrikangkugen ineba Lyngdoh parakataha.
“Da·o dipet dingtang dingtang sorkarini kamrangna dorgastorangko galengon, dongimin bilsiara bilsi 32-na batkujaengani gimin chadamberangna cholrang dongja gita ong·enga. Uni gimin chinga iani bidingo sorkari baksa agangrikangkugen,” ine Lyngdoh aganaha.
Mitam a·dokrangode kamni upper age limit-ko bilsi 38 aro bilsi 40-ona kingking donahani gimin Meghalaya a·dokoba kamna dongimin bilsiko uamang bilsi 37-ona ra·doatchina sorkariko didiangkugen ineba UDP-ni president parakataha.
Indake ong·engon, Meghalaya a·dokna Inner Line Permit (ILP) aro gipin nangchongmotgipa kamrangni gimin UDP ku·rangko on·angkugen ineba Lyngdoh parakataha.
