GUWAHATI: Assam aro Meghalaya-ni Chief Minister-rang New Delhi-ona re·ange Union Home Minister Amit Shah-ko grongena skang Sonibar salo, damdok meligrikgijagipa sima arini bidingo agangrikna grongtaiaha.
Taj Vivanta-o Himanta Biswa Sarma aro Conrad K Sangma- uamang minit 45 somoina asonge agangrikangaha.
Kobor man·soani gitade, tom·anio Meghalaya-ni Deputy Chief Minister Prestone Tynsong aro Assam Cabinet Minister Pijush Hazarika- uamangba damgni a·dokni songgipa regional committe memborrang aro gipin official-rang baksa bak ra·angpaha.
Uandake Hazarika, tom·a matchote kobor ra·timgiparang baksa agangrikao indine aganaha, “Da·al Sonibar salo Tynsong baksa Khanapara aro Patharkuchi jolo bang·gija ba on·tisa meligija dongako nirokeaha.”
“Inspection ba nirokna re·angon jolni manderang baksa agangrikaha aro report-ko a·dok sorkarina on·gen. Uni ja·mansa damgni a·dokni Chief Minister-rang Home Minister-ko gronggen aro Parliament-sa bon·kame raiko on·gen ine Hazarika, aganaha.
Sangma, mni Bristibar salo, ‘dolgni a·dokrang, damdok meligrikgijagipa biaprango kam ka·anio 98 percent kamrang matchotaha,’ ine parakataha.
Uandake meligrikna nangkugipa 2 percent sima ari biaprango, beben meligrikgijani donga indiba dolni a·dokrang report-ko nigrike kam ka·gen ine Sangma aganataha.
January 20 tariko dolgni a·dokni chief minister-rang Delhi-o Union Minister-ko grongeaha aro meligrikgijagipa damdok biaprango kam ka·ani gimin talate on·aha.
Meligrikgijagipa damdok biaprangara- Tarabari (4.69 sq km), Gizang (13.53 sq km), Hahim (3.51 sq km), Boklapara (1.57 sq km), Khanapara-Pilangkata (2.29 sq km) aro Ratacherra (11.20 sq km) – Meghalaya-ni West Khasi Hills, Ri Bhoi, East Jaintia Hills districts aro Assam-ni Cachar, Kamrup Metro aro Kamrup district-ni ning·o ga·akgipa biaprang ong·a.
