SHILLONG: Re·anggipa Robibar attamo, Shillong songjinmani Police Bazar-o IED bomako gopretanio jak donganina Hynniewtrep National Liberation Council (HNLC) bobil dolni Shillong jolrango area commander ong·e kam ka·enggipa mande saksako rim·aha ine Police-rang parakataha.
East Khasi Hills a·jani Superintendent of Police (SP) Sylvester Nongtnger-ni u·iatani gitade, Robibar attamo IED boma gopretani ja·man adita kontarangni gisepon police-rang, HNLC-ni ‘area commander’-ko potchipe, ia a·selni bidingo rim·na man·aha.
Ia mandeko sing·sandiani ja·mano police-rang, uni ba·rimarangoni saksani nokoniko jakchi tarigimin IED-koba man·aha aro ja·mano mikrontangchi nikgipa sakkirangni mikkangon ia IED-ko kimite galna man·aha ineba East Khasi Hills a·jani SP parakataha.
Re·anggipa Robibar attamni 6:30 bajimango, Shillong songjinmani Police Bazar jolo IED bomako gopretahachim. Ia boma gopretanio darangba saknaanirangkode man·jaha indiba boma gopretani ja·man bazaar-o koros ka·chichaenggipa manderang, kenjagoke kattokahachim.
Ia boma gopretani ja·mano HNLC bobil dolan gopretanio jak donga ine a·kangatskaahachim.
Police Bazar-o dokkan dakenggiparang HNLC bobil dolna kajinako gamna siktokjaengani gimin bomako gopretaha ineba HNLC bobil dolni dilgiparang parakataha.
HNLC bobil dolni gitcham general secretary Cheristerfield Thangkhiew-ko police-rangni so·otgalahani gimin mikkangchiba dingtang dingtang biaprango apsan daken bomarangko gopretangkugen ineba HNLC ka·mikkenataniko on·angaha.
