SHILLONG: Re·anggipa Sonibar walo, ma·sina man·gijagipa mande sakgni, AK-47 rifle-ko ra·bitenba, Shillong songjinmao donggipa petrol pump damgniko dakait dakaha ine kobor on·aha.
Koborko on·ani gitade, Sonibar walni 9:00 bajimango silchidare ra·bitgipa mande sakgni, helmet-rangko ganenba, Fire Brigade-o donggipa Pantaloon showroom sambani Assam Oil petrol pump-ona re·ange ia petrol pump-oniko gong 2,80,000 tangkarangko ra·seke ra·angaha aro uni ja·mano ia manderangan, Nongrim Hills-o donggipa Indian Oil petrol pump-koba dakait dakna jotton ka·aha.
Assam Oil petrol pump-ko nitimenggipa mande saksani u·iatani gitade, walni 9:00 bajimango mande sakgni bike-o re·bae, tangka ra·timgipa kuturio napaha aro uamangoni saksa silchidare mesoke ka·mikkenaton, uamangoni saksa tangka ra·timgipaoniko tangka dabiskaaha.
Ia petrol pump-oniko gong 2,80,000 tangkarangko ra·sekangani ja·man ia manderang, an·tangtangni ra·bagipa bike-o sale katangaha ineba kobor on·timgiparang aganaha.
Ja·mano ia apsan manderangan, Nongrim Hills-o donggipa petrol pump-koba dakait dakna re·angahachim indiba petrol pump-o tangka dongjani gimin uamang tangkarangko man·angjaha ine kobor on·aha.
Ia a·sel ong·ani ja·man police-rangna kobor on·aton, bakan police-rang, ia petrol pump damgniona re·ange, ia a·selni bidingo am·sandianirangko dakna a·bachengataha.
